徐雨石重返練馬師榜三甲了！今日（3日）第二場四班1200米泥地賽，徐雨石的「豹子頭」配何澤堯勝出，單Win及組合獨贏A2分別派77及28元。

連同第一場由梁家俊贏「天賜寶」，徐雨石火速起孖，現有16Win升上龍虎榜第三位，僅次羅富全、蔡約翰。

講番3歲新西蘭自購新馬「豹子頭」，今仗是服役首戰，此駒英文馬名Ugly Warrior，但表現一啲都唔醜，其同父同母兄長「胡卡之鷹」曾於新西蘭一級賽利雲經典賽獲季軍，其後轉戰澳門勝出1200米一級賽主席挑戰盃。而「豹子頭」本身曾在港試泥閘發揮高速跑第二，今仗一出即跑泥地賽，果然冇揀錯，沿途守第三位，雖然「豹子頭」只得3歲，而且體重僅992磅細細粒，但步姿純熟，臨尾纏鬥力亦強勁，以頸位力壓亞軍「頌友」掄元，一出即勝。

今場第二至四名順序為「頌友」、「連利進寶」及「按得澄」，四重彩派28,037元。

今日開局不前大熱，頭場雷神3.4倍的「踏雪名駒」及第二場潘頓2.6倍之「按得澄」，均大熱不入三甲。