古巨基同洪卓立今日喺灣仔出席電競活動宣傳，為即將出戰電競菁英盃隊伍打氣，古巨基透露曾經打機玩到世界級名次，由卡片遊戲機開始玩到任天堂。

網上遊戲發展後，古巨基話：「曾經玩足球game得過世界排名第8，嗰時古太都話我打機唔瞓覺，但未去到不眠不休，不過真係會唔沖涼，瞓醒就打維持3、4日。」同宅男無異。古巨基o依家都會打手機遊戲，佢話老婆冇佢咁好氣：「太太嘅朋友圈子大家會傾偈，話我打機好過出去蒲，起碼喺屋企可以睇到，好過去滾啦！咁我又唔係不良嗜好，只係仲有一份童心。」

古巨基籌辦首次執導同編劇電影，今次可以名正言順揀女，佢話：「可能係男仔呢，部戲暫時係男主角為主，勵志題材。」今個聖誕節古巨基同太太會外地工作度過，佢話會順便加油努力造人，性別唔重要，最緊要係BB健康，同自己嘅小朋友就開心。

洪卓立早兩日去大陸雲浮工作，同助手一齊買外賣食叫蘿蔔牛腩飯食，點知發現味道同口感都唔對路，懷疑自己食咗狗肉，立刻吐番出嚟，之後再到廣州食海鮮又搞到腸胃炎。

更多娛聞，喺晒《娛果》
http://fb.com/appledailyent