31歲、2012年港姐冠軍張名雅（Carat）同律師老公Joe結婚後開始減少拍劇，去年誕下大仔Mario，上周四(20號)再誕第二名囝囝Milo。本來係一件好開心嘅事，但原來張名雅心中一直好多憂慮，疑患產後抑鬱。佢今日喺Ig貼咗一張素顏抱住Milo嘅相，佢以英文發文，指自己陀二仔之後喊過好多次，因為覺得自己背叛咗大仔，又驚小朋友會呷醋，諗到呢度眼淚就不停流。

張名雅表示聽過一位婦科醫生講有啲父母將重心傾向照顧初生BB，因而忽視咗哥哥嘅故事，令佢產生好多憂慮。佢話﹕「有個案例係一位七歲嘅男仔話畀父母知佢能夠照顧好自己，主動叫Daddy媽咪專心照顧BB，就咁睇，佢真係一個好識諗嘅哥哥！不過有一日，呢位小朋友忽然話畀媽咪知，佢其實好唔開心，媽咪聽完之後就喊唔停，原來自己一直冇意識到湊初生BB係會傷害到大仔......當我聽完呢個案例之後，淚水就不受控咁狂標出嚟。」

張名雅嘅大仔Mario今年只有一歲半，佢話每當Mario見到爸爸媽媽抱住弟弟Milo嘅時候，Mario就會扭計同喊，令張名雅好心痛話﹕「見到佢喊，我個心深深被打咗下！Baby Milo同Baby Mario，爸爸、媽媽用愛創造咗你哋兩個，我哋永遠愛你哋！相信好快，兩兄弟嘅愛會隨成長而滋生，兄弟萬歲！」

精選娛聞，喺晒《娛果》 http://fb.com/appledailyent