英倫銀行行長金默文本月底離任，噚日接受BBC Radio 4專訪時罕有大爆感情史，太太Barbara原來係佢1970年讀劍橋大學嘅小情人，30年後先翻撻成功。佢退休後要還老婆債，應承太太學跳舞，一齊嘆世界。
65歲的金默文甚少講私事，坊間只知佢鍾意板球同足球，係英超阿士東維拉粉絲。
金默文坦言，為事業不惜犧牲私人生活，拍過幾次拖都冇結果，佢都估唔到，最後同劍橋大學嘅小情人Barbara舊情復熾。雖然兩人冇聯絡30年，Barbara喺家鄉芬蘭結過婚，又離過婚，但兩人重逢時感覺依舊，最後喺2007年拉埋天窗。
佢又喺節目內大晒恩愛，話如果被困沙漠，第一首諗起嘅歌，就係婚禮播過嘅《My Ship》。金默文對接班人卡尼信心十足，卸任後叠埋心水做老婆奴，答應老婆去學跳舞，充實生活。