二月頭《南華早報》喬遷時代廣場，在傳媒寒冬有此派頭，皆因老闆馬雲唔想過馬路去禮頓道去開會，一於黐住阿里巴巴大本營囉，包起兩層過百萬月租濕濕碎。

但係為咗食好西，首富都會起駕跨區嘅，誰人有此魅力？之唔係車胎人三星名廚Bombana囉，話說舊年在中環開張的意國私房菜Octavium，一晚只做八枱客一位難求，馬雲個個星期蒲頭都未夠喉，叫蔡崇信建議大廚做埋午餐啦，可見有錢佬都係為兩餐費煞思量。

3月頭首日開午市，好彩有得一嚐頭啖湯。四舊水唔使兩道菜，加一百有甜品，個自製蜜餞Gelato真係食到大家Yum Yum聲。

喂個價錢唔對路噃，中環區有粒星仔都七百起跳啦，肥嘟嘟大廚走過來解話：「我呢間真係餐廳仔，用來畀我團隊做下實驗，創作行先，唔敢收大餐廳價呀。」哎呀咁玩法，叫班為食闊佬更加食指大動，老闆林建岳肯定電話聽唔停。

專欄作家︰
宗菁華
錢唔多，但勝在針夠多；遊走中環，同班富豪、芬佬、股票佬、地產佬仲有擦鞋仔「發牙痕」，發掘政商界八卦熱話。

Facebook link︰
https://www.facebook.com/CentralGossip/