由對溫布頓那記中場笠射開始，碧咸便不斷為球迷帶來驚喜。07年離開皇馬到洛杉磯，大家以為當年32的咸哥已為投身荷李活作好準備，將絕迹歐洲頂級賽場了；豈料他一個「華麗轉身」，老多兩年先借到AC米蘭，而且仍有心有力，半季交出兩入球5助攻。再隔4年，37歲的咸哥又返來了！在PSG「地標戰」開球禮，看着比他還年輕的大哨朗拿度，已像退休多年的發福肥佬，碧咸不是又為大家帶來驚喜嗎？
有人說球壇真正巨星定義，係唔睇波嘅人都識佢。比利及馬勒當拿這些球王級人馬後，碧咸竟可躋身「巨星」之列，靠的當然是「樣」。這副面孔吸引了世上萬千女fans，最重要，是吸引到他的明星老婆維多利亞。

期待歐聯直播

這老婆除令碧咸跳出體育版，踩入觀眾層面更廣的娛樂版外，相信亦在碧咸選擇那間球會起了重大作用。看看咸哥離開曼聯後所到之處，馬德里、洛杉磯、米蘭到巴黎，不是世界級大城市便是名流時尚之地，令咸哥全面升呢。當年布力般話想簽碧咸，咪講笑啦！
然而，碧咸靠的絕不止是「樣」。同樣靚仔的基斯坦奴朗拿度，天份絕對比碧咸優勝；但碧咸靠的是不斷刻苦訓練，成就七旋斬絕招；年屆37，仍可於頂級賽場立足，背後所付出的努力可想而知。這份毅力就是咸哥吸引埋我呢類麻甩佬的原因。下周三PSG歐聯主場對華倫西亞，終於有直播睇，好期待。
方柏翹
now足球評述員