ViuTV實況選美節目《美選D.n.A.》以魔鬼（Devil）與天使（Angel）為主題，今日展開首輪面試，咁啱有三個同屬模特兒公司Pure嘅Natalie、Yoshi及Charlotte都嚟面試。

曾拍天堂鳥MV《Whatyouwant》嘅Charlotte，現年24歲任職model，佢話：「我叫Charlotte，可以叫我做沙律醬，朋友都一直有叫我參加選美，不過香港小姐選美壓力比較大，自己冇咩意慾，今次知道有呢個選美覺得幾有興趣，貼地啲、公平啲，係真嘅選美，唔係睇錢、睇學歷。」

Charlotte又話，自己對住好多鏡頭都OK，亦自言素顏都得，覺得真人騷應該要真實啲。

而22歲嘅NatalieFong剛喺恆生管理學院英文系畢業，佢就話：「朋友叫我嚟選嘅，覺得今次幾破格、幾創新。」問佢係唔係覺得港姐比較老土啲?Natalie笑住點頭：「我又唔係高材生，同埋今次係任務形式去玩，幾有趣，我都幾玩得，上山下海都冇問題，不過唔好叫我玩跳樓機，因為我有懼高。」

咁拍真人騷出賣朋友得唔得，Natalie就話：「都得，不過父母就唔出賣得，(咁出賣男朋友呢?)我要問下佢得唔得噃!」

此外，現年23歲嘅YoshiYu，做咗半年full-timemodel及兼職化妝師，Yoshi就話曾幫Mastercard做硬照廣告，覺得呢個選美比較特別啲、真實啲，玩法又有啲唔同。

問佢覺得自己係「Angel」定係「Devil」?Yoshi講：「我睇過宣傳片，覺得自己係Angel，之但係性格有啲男仔頭，有可能係Devil，因為喺宣傳片「Devil」都係有紋身，我個腳踭都有一個細紋身。」咁男友知唔知你選美、有冇咩底線、叫埋男友出鏡?佢直言：「男友都知，健康性感就得，太性感就唔好，男友都可以出鏡，佢係健身教練嚟!」