韓國「長腿Oppa」李敏鎬跟「國民初戀」秀智去年3月公開戀情，不過月初時二人驚傳分手，好彩二人所屬事務所隨即否認，仲透露oppa跟秀智BB依然恩愛。而節目《排行榜上的少女》近日就公開「公開戀愛的偶像情侶中面相及八字相襯」排行榜，當中李敏鎬跟秀智就排名第一。

節目指秀智額頭有唔少細碎頭髮，代表佢感情豐富細膩，面相畀人舒適自在嘅感覺，李敏鎬嘅長相就偏向西歐，嘴型清晰明確，性格似係比較固執。而秀智跟李敏鎬嘅面相，二人配對起嚟能夠彌補同保護彼此嘅不足，係非常好嘅情侶相。

而韓國女團f(x)前成員Sulli，跟大14年嘅男友崔子，就於排行榜中拎第三，節目指Sulli係典型嘅皇后面相，而崔子就因為有兇悍嘅眉眼同棱角分明嘅臉型，係有力量嘅男人面相，呢種面相就如同立咗大功嘅將領娶到公主一樣，仲指二人面相好適合結婚做夫婦。