【李八方online】素人當選千頭萬緒 大舊出區議員天書教路
蘋果日報 2019/12/04 14:53
陳偉業區議會大舊
經已淡出政壇嘅前立法會議員大舊陳偉業，可能已經冇乜人記得佢，不過佢冇唔記得香港。話說大舊整咗本《區議員入門手冊》俾一眾區議會新丁參考，八方睇過，都真係相當仔細。佢仲特別叮囑一班新人，做區議員最重要係個心態。
大舊除咗做過立法會議員，由80年代開始就係荃灣做區議員，一直到2011年落敗先冇再做。佢嘅經驗或多或少都值得新丁們參考。成本天書分成7個章節，由當選到履新期間，至區會日常工作、點同居民打交道、點樣搵啱自己嘅委員會加入、點樣跟進街坊各種奇難雜症、以至拆解港共喺地區網絡等等包羅萬有。
除咗各種招式之外，區議員嘅心法都有。大舊喺天書入面提到區議員有幾樣嘢係唔做得，例如唔好牽涉金錢糾紛、唔好因為人哋中傷而發嬲、唔好亂作承諾、唔好喺自己區內搞商業項目、唔好喺議辦做私人嘢、唔好成日唔開會、唔好自己一個返大陸、同埋唔好同內地官員同埋中資背景人士接觸。此外，仲有無論做區議員抑或做人都唔應該做嘅嘢，譬如講大話、過份自我吹噓同埋抹黑對手。
身在加拿大嘅大舊同八方講，呢次寫呢本天書，係因為民主派喺區選大勝後，唔少人都叫佢返香港教吓啲新人，咁佢返唔到嚟之餘亦教唔到咁多個，於是佢就搵咗以前嘅職員幫手，花一個星期時寫起天書。佢仲話，呢次區選結果都出乎佢意料，對於一眾新人，佢希望大家都謹記，做區議員一定要落區同埋建立好同街坊嘅關係，講到尾，佢做到咁多年區議員有部份係運，但有一半就係靠勤力同地區工作。
註：天書連結