財經專欄作家曹仁超（曹Sir）呢兩年兩度成功抗癌（胃癌與淋巴癌），噚日係病癒後首度復出講經濟同股市前景，佢以演講嘉賓身份出席一年一度嘅「香港經濟峯會」，繼續語出驚人，話𠵱家喺香港，做通渠佬好過做大學生，原因係𠵱家個個年輕人都要讀大學，個個都要爭取真普選咁話喎。
相對今年8月佢處於治療尾聲，曹Sir噚日狀態算係十分之好，說話時中氣十足，行路健步如飛，佢噚日肥番些少，面色較為紅潤，而且頭髮斑白得來算係濃密，8月時佢仲要戴帽示人㗎。
曹Sir喺論壇亦講得好高興，當有人提到𠵱家建築工人人工高，佢即刻好有同感咁分享個人經驗。佢話，曹太啱啱喺上個月搵人喺天台安裝洗手盆，對方做咗兩粒鐘就收成2,000蚊，即係時薪1,000蚊。佢近日再搵人整水喉，對方開價仲高，要成3,000蚊，仲要排期兩個星期，對方先至得閒嚟整。

佢好驚訝𠵱家竟然有呢類筍工，究其原因，佢打趣話，可能因為「家陣個個年輕人都要讀大學，個個都忙住爭取真普選，結果冇人做通渠、整洗手盆（呢類技術工種）。」
曹Sir呢個講法其實唔算新鮮，紐約前市長彭博（Michael Bloomberg）上個月出席一個公開場合，亦都建議年輕人如果考唔上名牌大學，又或者喺學術上並非有個人天份，倒不如做個水喉匠，咁樣反而可以賺到更多錢，唔需要浪費時間同金錢去讀大學。

睇淡香港　收息最穩陣

對於香港經濟，曹Sir亦有睇法。但佢一改過去十年大好友立場，加入淡友行例。佢話美元至今已升值15%，港元亦跟隨強勢，但根據歷史經驗，每當美元強勢，香港都唔多掂，佢建議投資者都係將錢擺喺滙豐銀行收息，安全啲喎。
不過話時話，華華早排搵師傅整水喉，500蚊搞掂，華華下次可以介紹師傅畀曹Sir喎。

李華華
mailto:[email protected]