日前韓國傳媒公開一份前總統李明博執政時嘅演藝界黑名單，當中包括韓版《步步驚心》男星李準基、朴贊郁導演、奉俊昊導演，共82人於名單內。

韓國時間今早10時左右，女星金美花現身首爾中央地方檢察院，以受害人身份接受檢察院有關李明博政府嘅黑名單調查。金美花現身時表示：「當時喺屋企哀嘆，點解係我。」之後表示，認為自己作為前輩應該企出嚟，唔止係為咗文化界嘅同伴，同時係為咗眾多年輕嘅藝術家。

金美花又表示：「如果總統將人民變成敵人，人民仲會相信呢個總統於國家內採取嘅行動嗎？」

2010年金美花曾於twitter上留言表示KBS內部有黑名單，因此自己唔可以演出節目，當時KBS起訴金美花名譽損毀，之後金美花召開記者會，當時佢表示：「自從我主持時事節目開始，有一部分媒體就話我係搞政治嘅藝人，我從冇搞過政治，作為呢個國家嘅搞笑藝人，每次大家有需要嘅時候我就參加活動逗大家笑，唔止係為咗我自己，為咗後輩，我絕唔可以忍受，要繼續戰鬥。」