港女流行瘦身，骨巉巉、奀挑鬼命都仲要ondiet，扭扭擰擰呢樣唔食，嗰樣唔掂，睇到一眾天生肥底人士眼火爆。肥嘟嘟面圓圓嘅Esther，由細到大經歷了無數次的收身計劃，可惜次次都泡湯，致命傷咪又係懶做運動囉！有見及此，小記帶Esther踩上JCShop，即場挑選3款減肥器械，一齊睇吓佢點收身啦！
記者：盧家蕙
攝影：周旭文
Model：Aster@Salvador

血淚史：遇不友善目光

大大件的Esther外表雖然可愛，但煩惱亦唔少，佢酸溜溜地大呻：「早就習慣晒俾人由頭scan到落腳嘅不友善目光啦，一到夏天就特別煩躁，你睇吓通街啲衫全部係XS至M，L碼愈來愈少見！就算標明係大碼，着上身肥膏逼晒出嚟，一截截好肉酸！我唔想來來去去都係買嗰幾個brand，自己照鏡都嫌悶啦！」

3大傷心事件
做gym肉騰騰

入會做gym，肥肉拋拋吓，實俾人笑到面黃啦！

見得唔食得

香噴噴熱辣辣的出爐麵包，再食就變發水麵包。

件件細碼衫

件件都咁細，賣童裝衫咩？

Esther小資料

身高165cm
體重170磅
手臂13.5"
小腿17

小記最近發現了第二代的FuraFura纖體震脂機，聲稱可製造10級地震的效果，繼而極速震散脂肪，一直想減肥的Esther聽後即躍躍欲試，就睇吓佢點試用呢部震脂機。

消脂快過跑步機2倍

呢部踏步纖體震脂機聲稱採用運動科學中的平衡側動，讓全身脂肪運動起來，消脂速度比跑步機快2倍喎！通過搖擺方式帶動了全身各部位運動，可加速血液循環，刺激體內荷爾蒙分泌，增強身體的柔軟度及關節可動性，仲可以改善風濕所引起的腿部不靈活㖭。

震脂機闊21"×深17"×高46"
售價：$5,980（送24個月免息分期）

女性脂肪　數值參考

小於17 過輕
17-27 正常
大過27 過重

百變減肥招式

（以★★★★★為最難）

交腿式：鍛煉肩、腰、腹及腿部肌肉

「我咁大份，塞到入去已經偷笑，仲要蹺腳好辛苦！」
難度：★★★

半蹲式：鍛煉背、臂大頭肌及腿部肌肉

「幾容易，屈住對腳啫！」
難度：★

弓步式：鍛煉腿、腹及大腿肌肉。

難度：★

側臂式：鍛煉肩、手部肌肉

「啱晒收拜拜肉。」
難度：★

進階：一味夠騎
俯卧撐式：針對肩、胸、手臂及上身肌肉

「Hold住呢個動作已經瘦咗啦！」
難度：★★★★★

單腿式：修飾腳部、大腿及臀部肌肉

難度：★★★★★

前趴式：鍛煉胸、臂

「好難想像連個胸都震埋。」
難度：★

震到嘔白泡

機的震幅可隨意調校（1-20級），小記同Esther即場試玩，由腳板底震到上頭頂，果然有地震山崩的效果！為了讓大家睇到佢嘅威力，我哋將盛有1/3樽可樂嘅膠樽放在踏板上，開動震脂機，調至20級，睇吓有咩變化。

玩機小貼士

1.唔好一步登天，應逐少加大級數，讓身體慢慢適應，唔係好易玩到頭暈眼花。
2.千祈唔好開住冷氣做，效力會大減。

Esther評語：「呢部機話用1個月減5-10kg，腰圍減2-4吋，我有少少質疑。不過出咁多汗，起碼可以去水腫，而且招式多變，都值得玩嘅！」

20km/h飛車瘦身

一般家用的單車減肥機從來都係你踩佢郁，估唔到已經發展到反推你前進。呢部自行調速腳踏車，是以自動模式進行的懶人專用減肥機，擺對腳上腳踏即自動轉動，睇住電視都可他他條條做機。
Esther有say：「雖然係方便咗，感覺反而郁少咗，單車都係自己踩好啲！」

揼槌仔拜拜鬼祟肉

呢個槌仔game只須要插AV線直駁電視機就玩得，玩法係緊握槌仔，對住感應器出招，愈大力愈肉緊就愈易出汗，而且仲分10個level，務求令你在不知不覺收晒手臂啲鬼祟肉。

Shop：JCShop（31022783）