君子報仇，十年未晚。去年底自由黨20周年晚會，梁振英下令所有司長同局長全面杯葛自由黨，一個都唔准去。黨魁田北俊決定以牙還牙，噚日率領自由黨黨員集體杯葛狼英喺禮賓府搞嘅酒會，向來寸嘴嘅田少仲話呀：「乜佢有個酒會咩？我只係會記得我會去嘅酒會。」黨主席周梁淑怡則明言，既然狼英唔鍾意自由黨，佢哋去嚟都冇意思。

狼英主場新春團拜，自由黨十倍奉還玩杯葛都唔奇怪，但據聞其他捧場嘅各界人士都唔算多，長毛梁國雄席間叫狼英下台，話對方「講大話」。
而杯葛禮賓府團拜外，立法會本月24日慣常宴請狼振英嘅新春午宴，自由黨一樣冇面畀。田少話到時只有鍾國斌、易志明出席，佢自己就唔會去嘞。咁又係，去到邊會有胃口？但中聯辦嗰個團拜佢哋就會捧場嘞。
唔去飲飲食食事小，投票點企位先事大。田少話民主黨涂謹申提出嘅買家印花稅修訂，令日後政府調整稅率要先問過立會，自由黨嗰五票會企定定支持。修訂過唔過到，視乎經民聯石禮謙係咪說服到佢嘅黨友，所以田少同傳媒起筷前舉杯，預祝大嚿石馬到功成。擔唔擔心西環不滿自由黨同泛民越行越埋？周太話，佢哋係綜合分析作出正確決定。

預算案派糖先收貨

嚟緊公佈嘅預算案，田少講明退稅、免差餉、電費回贈缺一不可，因為政府儲備豐厚，年年都有盈餘，唔相信儲備用罄嘅言論，仲話唔派糖點對得住班交稅中產。
前航運交通界議員、自由黨榮譽主席劉健儀就批評，早前商經局局長蘇錦樑話香港仲有好多空間招待更多旅客，對香港市民嚟講只係「等多一班車」，反映蘇錦樑未有切身體會實際情況「亂咁噏」。新十五未過，自由黨已經上晒子彈，睇嚟政府未來一年都有排受。

mailto:[email protected]