「綠在深水埗」係環保署喺全港第五個投入服務嘅「綠在區區」項目，支援社區回收同環保教育工作，由保良局營運。「綠在深水埗」試業首半年，聯繫區內屋苑、機構同學校舉辦過百場環保教育活動，參與人次超過5,000，並回收逾4,000公斤廢物。計劃今日舉行開幕禮並正式投入服務，環境局局長黃錦星親臨主禮。

星爺致辭時特別多謝保良局，指保良局係營運「綠在區區」其中一個先行者，現正營運項「綠在東區」，政府希望善用非牟利組織嘅基礎網絡，喺社區夥伴協作下，將環保減廢理念行動結合。

「綠在深水埗」位於深水埗通州街339號，佔地約4萬呎，除指定日期，朝八晚八向公眾開放，除咗提供綠化休憩空間，亦設置以回收物料製成嘅互動遊戲設備如滑梯及電能單車等，等大家喺遊戲中認識環保訊息，場內亦提供社區回收物流支援服務，收集回收物如玻璃樽、電腦配件、電器產品、充電池等。