陳家樂同余香凝拍拖近4年，突然傳出分手消息，兩人同日（14日）分別見過傳媒，陳家樂更因此兩度落淚承認已分開，陳家樂其後更於ig發文稱「仍視余香凝為我最親的親人」，今日就收拾心情喺沙田為護膚品牌宣傳。（新聞連結： https://bit.ly/2MuyWGP ）

早上11時半左右陳家樂喺沙田新城市廣場現身，神情木訥欠缺笑容，似乎仍然受分手一事影響。雖然經理人公司事前表示陳家樂唔會受訪，但係佢最終都有停低受訪。

問到心情平伏番未？陳家樂話：「我覺得其實呢刻講乜都冇乜用，都會有其他效果，o依家嘅人相信嘅事，係佢哋想去相信嘅事。我喺呢度最後講一次，事實係余香凝唔係咁嘅人，佢無偷食，我哋係和平分手。」

係咪好心痛前女友被喪插？陳家樂話：「呢個唔係事實，一個女仔承受咁大壓力，我覺得唔可以。」問到佢有無安慰前女友？佢話冇為呢啲事去傾，因為對方要時間冷靜：「我想像唔到呢件事發酵到咁大，至於分手原因，我唔想講咁多，我哋係有共識嘅，大概係一個月嘅事。」陳家樂仲話唔公開分訊，係因為大家有共識，想完成埋手上嘅工作先。

咁會唔會放個假散心？陳家樂話：「我想繼續工作，工作係最好嘅面對方法。」佢又再強調余香凝永遠都係佢好朋友，但係就話復合呢啲嘢，遲啲先再算。

追問佢哋會唔會再為分手嘅事好好傾下？陳家樂就雙手合十，由助手及保安人員護送離開。佢去到品牌嘅舖頭嗰陣，吸引大批市民圍觀，仲不時表現專業。

精選娛聞，喺晒《娛果》
http://fb.com/appledailyent