由香港第一家庭領銜主演嘅《我爸是梁特》如果喺大銀幕上映，相信票房爆燈，不過想食住花生等睇好戲都唔係冇辦法，皆因人稱飛天朱嘅前港區人大代表朱幼麟之前被《文匯報》批評係「大話朱」，當時身在外國嘅佢話明「返嚟就郁」，佢今日將會喺外國記者協會開記招反駁，仲向八方預告有三大主題，保證「好精采」，提傳媒帶多啲電池去拍攝呀！
飛天朱之前踢爆梁特喺行李門事件中施壓整喊航空公司職員，飛天朱得罪方丈嘅下場係遭左報發功狂轟，《文匯報》封佢做「大話朱」；而之前香港空勤人員總工會發動機場集會，「愛國」導演高志森都向梁特表心迹，集會當日喺fb留言話：「撞佢個鬼，一出機場就見到班顛（癲）狗。」

「係一個成年人有問題」

飛天朱噚日同八方預告，話今日記招有三個主題，分別係回應高志森「癲狗論」；二係回應《文匯報》「大話朱」批評；三係講香港青年問題，「回應特首嘅」。佢同八方講：「香港青年講本土、港獨問題，我可以話香港青年冇問題，係成年人有問題，特別係其中一個成年人！」八方估計飛天朱講嘅「成年人」應該係「一男子」。
除咗開記招大反擊，聽聞飛天朱想搵黃毓民同李慧玲兩個商台前名嘴開咪做節目，佢噚日話講咗記招嘅嘢先，開咪遲啲講。八方都問過毓民係咪有件咁嘅事，佢笑笑口話同飛天朱好熟，但就冇興趣同李一齊做節目，如果要做，就叫飛天朱上佢網台開咪好過喎。

李八方
mailto:[email protected]