當年今日
關於我們

睇代理攞獎知樓市去向

蘋果日報 2006/08/08 00:00


樓市究竟升定跌、旺定淡,甚至話邊個區係焦點,睇吓經紀嘅每月成績表就一清二楚。香港置業嘅主管會,頒咗個「7月份置尊大獎」畀新界東及將軍澳區老頂王品弟,佢嘅下屬南豐廣場分行客戶經理李玉英,就攞咗最多成交宗數營業員獎,換句話講,將軍澳係7月份,甚至係8月份嘅樓市焦點,都唔會錯得去邊。
上個月將軍澳君傲灣賣貨尾,今個月城中駅又話隨時上馬,成個區人流旺咗好多,一手同二手都多咗客搵貨,李玉英上個月促成7單生意,王品弟就因為港置喺區內市場佔有率超過兩成,齊齊攞獎。
另外,都係王品弟旗下嘅將軍澳中心分行林文婷,就攞「優質服務顧客滿意度獎」,呢個獎係「置」優質服務計劃嘅一項比賽,透過客戶問卷調查同埋電話訪問,選出每個月3位前線員工成為得獎者,同場攞獎嘅仲有麗港城分行高玉蓓,同皇后大道中九號分行嘅陳漢榮,聽講3個人都攞滿分。