人民力量主席慢必陳志全喺立法會跳過議員座位、佔領主席台等抗爭統統難唔到佢，身手咁敏捷似奀皮仔，但佢細個卻原來係個乖學生，讀書成績好之餘，仲攞過唔少操行獎同學業獎，仲曾經因歌喉出眾，連天才表演獎都攞過。慢必話小時家境唔好，同妹妹及父母住喺灣仔板間房，高𥧌時試過一屋七伙，細個已深明三無人士嘅苦況。
講起難忘嘅兒時記憶，44歲嘅慢必就話佢喺灣仔福臨門做廚嘅爸爸，偶爾會攞酒樓食剩嘅佳餚返屋企分享，最常食到就係烚熟咗嘅龍蝦頭，算係當時少有嘅奢侈品，但最令慢必開心嘅係福臨門每年嘅春茗，因為除咗一家人可以食餐好，仲有抽獎，令慢必可以得到平日冇錢買嘅玩具。

爸爸幫手搭路入商台

由於慢必爸爸喺福臨門做廚，有機會識到唔少富豪，當年慢必有機會去商台打暑期工，原來係爸爸同熟客之一嘅商台老闆何佐芝搭路，令佢有機會去何佐芝屋企面試。慢必中大畢業後喺商台「過五關、斬六將」下做DJ，一做就15年，識咗個合拍戰友、現時人力副主席快必譚得志，兩個人除咗主持過亞視搞笑節目，仲一齊拍過港產電影。
慢必2012年當選立法會議員前，原來曾經師從李居明研究佛學，後來因政見不同，分道揚鑣，但慢必至今仍有睇佛經，未有放棄信佛，𠵱家喺議員辦事處都有供奉。