來自大陸嘅樂視，大舉進軍香港，打頭陣係網劇，盛傳更燒銀紙購下英超直播權，作價4億美元（約30億港元）。

由睇劇到睇波，樂視左右包抄，不過是否合港人口味，仍是未知。在港頭炮作《我的老千生涯》部份在港取景，曾國祥、徐少強之子徐偉棟、石修兒子陳宇琛主演，改編自同名小說，顧名思義是講一個老千的故事。內地對黃賭毒題材敏感，但網劇審批就寬容度高啲啲，不過當然都有所保留。

今日一眾演員及張松枝、劉永、石修、魯芬、邵音音等，齊到鑽石山出席宣傳。該劇下周一推出，共40集，每集20分鐘左右。曾國祥自言冇諗過套劇可以喺香港播，故此套劇唔係佢哋現場收音。

可擔心香港網民難以投入？曾國祥話:「唔知呀。(有冇信心？)冇諗過，因為根本都冇諗過香港會播，但好開心。」佢又話唔知幾多港人知道樂視，故會幫手宣傳。

咁有冇諗過再拍劇？曾國祥話:「o依家得番TVB，王維基冇咗，亞視唔知點。」亞視有新股東注資100億喎——資金來源不明。曾國祥聞言謂:「話啫，搞得嚟有排，演員要開飯0架嘛。多個平台當然做。」即係如果亞視搵你都OK？「冇話唔制，我又唔係TVB，我老豆係啫!」

同場另一位星二代——徐偉棟，徐少強之子，早前亞視話搵佢哋父子兵拍新版《天蠶變》——早前係指2013年8月嘅事。可有下文？徐偉棟話:「係有搵過，(跟住？)冇啦，可能佢哋度緊劇本，搞個生化危機，等佢哋返老還童先至拍。」

前無綫+前港視藝人張松枝，今日都話有留意亞視易主單嘢，佢嘅睇法係:「我覺得係一件好事，唔知政府批唔批，如批得出，發展係幾好，因為佢哋都搞網劇，未來都係朝呢個方向。」咁亞視有冇搵你？松枝即爆料，自爆半年前有人搵佢，問佢有冇興趣拍劇，結果都係冇下文。就算係拍，都要睇下拍乜嘢題材先再決定。

雖然張松枝好似幾睇好亞視易手，但佢未經通訊事務管理局通過就完成股權轉讓交易，易手一事存暗湧。張松枝表示:「呢個只係程序上問題，我覺得上面已批咗。」邊個「上面」先？

簽亞視，分分鐘要承擔拖糧風險，張松枝即謂:「唔一定要簽藝員合約，可以簽部頭0架嘛。」