早幾年強國掘起，范冰冰、李冰冰雙冰殺入荷李活，甚至景甜近年都強行「植入」多套大製作電影。

不過荷李活片商正開始減少起用中國演員，仲似乎轉吹東洋風。大導演史提芬史匹堡（Steven Spielberg）最新力作《挑戰者1號》（Ready Player One）已在香港上映，電影融入大量80及90年代電影及日本動漫元素，為觀眾勾起唔少童年回憶，當中《高達》登場戲份更令人驚喜，而片中負責控制高達嘅虛擬角色大刀，飾演其幕後玩家嘅27歲日本男星森崎溫都十分搶戲，以新人姿態成功闖美。森崎溫入行10年，佢亦係男子組合PrizmaX主將，由於出生自緬甸所以操得一口流利英文，獲史匹堡大讚充滿魅力，下月佢就會同導演、男主角泰舒利頓（Tye Sheridan）、女主角奧莉菲亞谷卡（Olivia Cooke）一同出席《挑戰者1號》嘅日本首映禮。

至於同期上映嘅《悍戰太平洋2：起義時空》（Pacific Rim：Uprising），巧合地片中都有高達出現，除咗景甜擔大旗演重要角色邵立雯外，仲有張晉、黃愷傑等華人演員，雖然上集女主角菊地凜子在片中慘被賜死，但著名影星千葉真一嘅囝囝新田真劍佑就扮演新丁駕駛員出現多個鏡頭。21歲嘅真劍佑以靚仔樣獲得不少機會，靠父親名氣更獲接拍《悍戰太平洋2》，可惜片中對白不多，唔知開拍第三集嘅話又能否突圍而出。

至於日本女星忽那汐里仲威水，曾拍侯孝賢電影《刺客 聶隱娘》嘅佢於澳洲長大，唔止參演Netflix電影新作《局外人》（The Outsider），佢喺萬眾期待嘅《死侍2》（Deadpool 2）入面都備受器重，其一頭紫色頭髮造型已在預告片中曝光。

精選娛聞，喺晒《娛果》
http://fb.com/appledailyent