當年今日
關於我們

隔牆有耳:生日食美心被狙擊 
泰博︰黃絲不可理喻(李八方)

蘋果日報 2020/11/06 00:00


慶生食蛋糕食到引起哄動,相信熱血公民立法會議員鄭松泰都未必估到。話說泰博噚日喺fb貼咗張喺立法會切蛋糕慶祝37歲生日嘅許願相,話今年冇乜特別要求,只希望大家可以早日去日本旅行兼返家鄉探親。但網民發現佢嘅蛋糕,原來係被黃絲認定係「藍店」嘅美心出品,並留言狙擊「好揀唔揀揀美心」,又寸爆問佢幾時飲埋個燉湯?
泰博對批評一於少理,仲留言讚蛋糕好味,議員助理「四眼哥哥」鄭錦滿就話個蛋糕係佢揀嘅。泰博之後再喺社交網發文,話親身證實咗「點解黃絲大部份時間咁不可理喻?」又話作為一個邁向中年嘅國際年輕學人,係咪要打兩千字去回應呢類指控呢!又惹嚟網民熱烈留言,泰博點回應?佢話 「留言好歡樂」、「祝我生日快樂」。
李八方