由孔孝真同趙寅成主演嘅新劇《沒關係，是愛情啊》噚晚播第十集，以10％收視包尾，繼續不敵同檔劇集《朝鮮神槍手》（11.7％）同韓版《命中注定我愛你》（11.1％）。

第十集講到張載烈（趙寅成飾）話要搬返屋企，令池海秀（孔孝真飾）非常錯愕而且不敢相信，兩人因為呢件事而嗌交，不過分開時又非常掛住對方，而海秀得知載烈嘅浴室密碼後，就去咗浴室，瞓喺載烈嘅浴缸裡感受載烈嘅氣息。

另一邊廂，趙東民(成東日飾)去醫院探張載範（梁益俊飾），並對載範進行催眠。載範回憶起以前媽媽同載烈開心嘅情景，同埋媽媽打自己嘅畫面。之後載範諗起以前繼父打載烈時，自己去救載烈，載烈見到載範被打，於是拎起刀，喺混亂中繼父撞因向載烈而被刀刺死。

同一時候，海秀前男友崔浩（都想友飾）同載烈發生爭執而打起上嚟，之後載烈喺咖啡室前見到韓江宇（D.O.飾），但身邊嘅崔浩同朴洙光（李光洙飾）就見唔到韓江宇，覺得好奇怪。而泰勇（韓貞賢飾）去警局幫載烈拎嘢時，警察俾泰勇睇CCTV，發現載烈行為怪異，而泰勇睇完之後情緒激動，不過都按警察提供嘅地址去韓江宇嘅屋企，發現其實係載烈小時候嘅屋企，之後又開始打電話同去韓江宇嘅學校查明真相，但一直搵唔到「韓江宇」呢個人，令張載烈有妄想症一事漸漸浮面。