37歲嘅甘比(陳凱韻)，現時為老公劉鑾雄陀第3胎，年紀輕輕嘅佢，早排成為香港女首富，套用三師兄所講，甘比秒秒鐘又豈止幾十萬上落。不過數字遊戲嘅嘢，又點及仔女矜貴，就算做咗女首富，大住肚嘅甘比，依舊每日都親自陪仔女返、放學，絕不假手於外傭姐姐或保鑣。

上周四(上月31日)下晝4點半，《蘋果》見到腹大便便嘅甘比，着住鬆身裙再加平底鞋，帶埋一對仔女、8歲秀樺同4歲仲學，去咗銅鑼灣皇室堡嘅冒險樂園推水晶同玩遊戲。同行仲有甘比媽咪同三個保鑣。現場所見，秀樺着住校服，至於細佬仲學就着便服，估計秀樺啱啱放學。話晒現階段都係開學時間，功課唔算多，所以甘比就帶對仔女去樂園放電。

縱使有咗BB，甘比都有陪囝囝仲學玩新款氣墊球遊戲，甘比就同囝囝為一組，對手就係其中一個保鑣。由於仲學唔夠高，所以甘比就嗌職員攞張凳仔墊高囝囝。期間佢又教仲學玩法，精力充沛嘅仲學，仲玩到笑晒拍手兼揼地，之後兩母子又會合返秀樺同婆婆，一齊玩拋籃球。

玩到咁上下，甘比同仲學先「轉場」過隔籬檔玩推水晶機。其實呢部機，之前甘比都有玩過。(新聞連結： http://bit.ly/2vHO1f5 )鍾意嘅原因，係因為一對仔女都迷上收集呢啲水晶擺設，所以甘比就投其所好，得閒就推吓。呢日仲未學識點玩嘅仲學，就同媽咪分別一人一部機去推。眼仔睩睩全神貫注望實公仔箱嘅仲學，玩咗幾次後，終於掌握竅門，仲連推仲5次之多，異常興奮嘅佢，開心到跳起，拍手又咔咔大笑，連帶亦感染企喺身邊嘅媽咪。仲學每次踎低拎水晶，都會將啲戰利品放喺保鑣個環保袋中，非常乖巧。之後，家姐秀樺同婆婆亦加入推水晶行列，不過技術上，就比細佬稍遜一疇，玩咗幾次都未能成功推到水晶。最後，甘比同仔女足足玩咗個幾鐘先至肯走。