王浩信（Vincent）自婚變傳聞後，今日首度現身，與唐詩詠、陳敏之、張頴康、馮盈盈、張曦雯等出席新劇《解決師》記者會。

為配合角色，王浩信前陰整咗「一片」假髮，望落個樣有啲脹，唔知佢真係肥咗，定假髮連累事，問到同太太陳自瑤（YoYo）關係？佢話：「唔係事實嘅嘢唔回應。（係咪恩愛如昔？）都係咁生活，我覺得唔係每日都要咁恩愛先至係正常，當然會有嗌交，亦有開心嘅時候，生活就係咁。」佢話唔會刻意放閃，唔想將屋企事當大家娛樂新聞，希望大家給予空間。至於早前因為去美國登台，搞到冇得慶祝父親節，Vincent就話已補祝，仲收到囡囡畫作做父親節嘅禮物。（新聞連結： https://bit.ly/2JYjggo ）

講番部劇，Vincent透露劇中佢嘅功夫好了得，所以搵咗好友伍允龍傳授伍家拳，佢話：「係我拍劇以來最多動作場面同最驚險一次，受傷機會自然會多啲。」而張曦雯以一頭清純直髮look亮相，會扮演學生，與王浩信有kiss戲，問擔唔擔心惹緋聞？佢話：「唔驚，如果有緋聞即係證明大家睇得投入。」

至於取代岑麗香角色嘅唐詩詠，喺劇中飾演老師，但又係黑幫份子嘅千金。提到王浩信屢傳婚變，唐詩詠就話唔多講，反而恭喜舊愛崔建邦搵到新女友，佢話：「戥佢開心，佢都長大咗，其實之前喺公司見過佢，都有叫佢快啲結婚。」

精選娛聞，喺晒《娛果》
http://fb.com/appledailyent