北京嘅霧霾一向都好受到大家嘅關注，而喺噚日重霧霾天氣開始突襲北京，城內一片灰濛，霧霾瀰漫，空氣混濁，就連天安門都睇唔到。根據平安北京嘅微博，指今日北京嘅大部分地區有濃霧,能見度小於200米。而呢種霧霾，都影響咗一班藝人。

好似王菲咁，佢今日就喺微博貼咗張相，就係喺佢屋企嘅露台影出去，其實就咩都睇唔到，因為實在太大霧喇，阿菲仲好風趣咁話：「仙境。」仲有網民留言講笑話：「再也不用擔心狗仔在窗外偷拍了。」

另外導演爾冬陞都今日都有喺微博講到霧霾，佢就貼咗一張喺飛機上面嘅相話：「首都機場是搬了嗎？」佢咁講係因為張相完全睇唔到個機場，真係好大霧。內地導演陸川都有貼相喺微博話：「能見度為零！生活在一個地獄中。這樣的天氣真應該全市放假。」張相就真係咩都睇唔到，連喺咩地方影都唔知。

內地演員孫儷都因為霧霾而講嘢，佢先喺微博貼咗一張「空氣質量指數」圖，圖中就講到北京全市「重度污染」，孫儷就話：「是一天外景，肺，我對不起你。」之後過咗一陣，佢又再話：「北京天氣那麼差，在我們拍攝點盡然還有學校組織秋遊！這樣的天，難道不應該取消嗎？我天哪！如果是我孩子我堅決不同意參加，生命健康比什麼都重要！」