上周五大市雖急升320點，但走勢詭異，唔少強勢股都唔升，個別甚至急插半成以上。個人以強勢股作主力，大升市組合卻一片紅海，感覺絕不良好。有戰友問是否要跟風沽強勢股，換入煤股追落後？魏力認為不必，因炒作主題日日新款，上日是煤炭及航天，今日就汽車及玻璃，明天又輪到新能源及基建，日日追漲殺跌，使費唔見一截，更容易左一巴、右一巴！反之，趁回吐加注強勢股，中長線回報更吸引。
市勢雜亂無章，短炒風險高，不如作中線推介。城鎮化及潔淨能源是今年兩大主題，博耳電力（1685）兼而有之，是可博升五成至一倍的選擇。博耳主攻智能配電系統方案，佔收入六成，毛利率近四成；節能方案亦佔收入17%。

阿爺料未來10年投資4萬億元人仔建智能電網，並優先發展智能配電系統。博耳去年先後中標無錫地鐵工程及北京數據中心項目，涉資逾1億元，並已獲南方電網列入相關資格名單，奠定未來數年的高增長基礎。
公司上市以來年年賺錢，以去年多賺一成計，現價PE僅10倍，較亂炒冇盈利的環保股安心得多。無寶不落的「民企之父」張化橋，上月以4.16元增持博耳至0.1%，更添信心。中線睇6蚊，都係13倍PE左右。

魏力
http://www.facebook.com/2012jason