異動空間:蠟筆小新渾身是勁 - 魏力

蘋果日報 2012/12/10 00:00


近日股份遍地開花,唔少戰友都話「多到唔知點揀」。其實毋須太花心,樣樣都想買,最後多數揀錯股。既然中資股開車,不妨先剔走本地股,諗都唔好諗,再從國策大方向出發,農業、基建係核心,上月底本欄已推介一拖(038),買入後擺埋一邊就得。內需股中,魏力最睇好食品股,無他,經濟好壞都要食。
食品股中,旺旺(151)、統一(220)及康師傅(322)明年預測PE均為27倍,穩陣但爆炸力不足,而概念相近的蠟筆小新食品(1262),預測PE得8倍,是一隻長期受市場忽略的食品股。隨着市況回暖,公司潛力料逐步體現於股價,值博率甚高。
公司以「蠟筆小新」做品牌,主攻果凍食品,去年內地市佔率17.4%,僅次於喜之郎,旺旺果凍都只係排第6。上月獲Rovio授權,在內地獨家生產Angry Bird包裝食品,有助產品多元化。公司上半年毛利率41.1%,高過一眾龍頭;純利1.6億人仔,增長25%。如下半年表現相若,預測PE得8倍,PB1.5 倍,折讓相當大。
上周五漲5.2%,大成交創上市新高,收報2.84元;周線圖以大陽燭突破10月以來的旗型整固,料將爆發巨大升浪,先以10倍PE做目標,睇3.50元。
魏力
http://www.facebook.com/2012jason