【新增動新聞】
艾華遜（Allen Iverson）、積遜威廉士（Jason Williams）、路易士（Rashard Lewis）…NBA球迷那些年的回憶，終於喺籃球場上再現身影！由艾華遜同藝人Ice Cube牽頭舉行嘅BIG 3三人籃球聯賽，周日喺紐約布魯克林揭開序幕！其中42歲嘅AI喺第3場率領3's Company出場，雖然佢上陣時間唔多，全場6射1中只得兩分兩助攻，但球迷依然為佢唯一命中嘅跳投歡呼喝采！球隊亦以61:51擊敗Ball Hogs。被問到身體感覺如何，AI表示：「42歲。退咗休。我嘅感覺好似冇打波6、7年，但呢個係我預期之內，自己身為教練兼隊長，感覺良好嘅時候可以換自己出場，就算打一分鐘都好，都希望俾球迷見到我上陣。」

同日另一場焦點賽事，代表3 Headed Monsters嘅41歲「白朱古力」積遜威廉士搏到右腳受傷退下火線，但球隊靠路易士完場前「3-point play」得手，以62:60險勝Ghost Ballers。呢項賽事將會連續10個周末喺不同場地舉行，8月26日將會喺拉斯維加斯上演冠軍戰。