周日NBA季後賽,黃蜂(圖右)喺東岸首圈Game 7全場都處於下風嘅情況下,作客以73:106不敵熱火(圖左)。即使黃蜂班主米高佐敦(Michael Jordan)同柏賓(Scottie Pippen)齊齊入場打氣,都係幫唔到手。
熱火控衞積格斯(Goran Dragic)射入全場最高25分,「白邊哥」韋西迪(Hassan Whiteside)亦貢獻出「雙雙」10分12籃板,真係將黃蜂打到毫無還擊之力。不過今場只得九分嘅主將K獲加(Kemba Walker),就為黃蜂今季嘅表現自豪:「我哋今季好多傷兵,但係球隊都可以克服重重難關,打入季後賽。」