Him話：「我成手call輪，同兩鐵合併共存亡。」幻魔之神都話：「我唔係股東，但梗係贊成，因為我有地鐵call輪喺手，唔通過一於上街遊行。」楊汀亦話：「頂住呀，我一半身家入咗地鐵，唔通過跳樓都似。啲未上車嘅人眼紅我哋上咗車嘅君子，係咁叫人反對，我哋勁好定力，點都唔畀佢哋震走。」
雖然好多網友都希望兩鐵合併通過，但揸住地鐵股票嘅網友就擔心，自己股小力弱，趕去投票都係嘥氣。好似Momo42話：「你哋只係小股東有咩用，人哋ISS叫基金公司投反對票，其實都係基金大戶話晒事。」cutecute123都好同意：「我雖然係地鐵嘅小小股東，不過我唔會去投票，因為投唔投都係基金佬決定晒，有冇我投票都冇意思，我都係得少少股數，只希望佢股價升多啲，可以賺多少少。」
RichFong71話反對嘅人啲理據都唔成立，「講真，地鐵車費主導權一向都有名冇實。」Momo42認為，無論合併通唔通過，對地鐵股價都有利，「通過固然好，唔通過即係迫政府買起地鐵，之後再私有化，到時想唔搶高都幾難。」佢係咪天真咗啲呢呵！