立法會議員平時分黨分派，但遇到外敵時就會聯成一線舉腳對外。今日喺小西灣足球場舉行嘅「足球四角邀請賽」，議員就會拉埋政府官員組隊，惡鬥澳門嘅過江龍，有份落場嘅高達話自己嘅狀態好fit，皆因早排踢完「普選盃」，上星期又同港台隊比賽，家吓閒閒哋跑足90分鐘全場都唔索氣咁話。

前巴西國腳坐鎮

高達同八方吹水，都未抹嘴，睇到澳門隊嘅陣容開始腳軟，原來對方有前意大利國際米蘭前鋒康偉道同前荷蘭甲組球員丹尼奧坐鎮，連70年代前巴西國家隊員、同球王比利一齊捧世界盃嘅阿爾拔圖都落場。澳門隊人腳勁揪，香港隊隊長陳智思排出個奇陣應戰，竟然叫高達mark實阿爾拔圖，話若果凍結對方攻勢，穩守突擊就有機會贏波。肩負重任嘅高達口震震話：「聽講阿爾拔圖喺澳門打工，雖然𠵱家有成六張幾嘢，但淨係扭腳法都冇得鬥啦，叫我睇實佢對腳就得。睇嚟澳門隊今鋪志在必得。」
雖然澳門隊排出強陣，港隊都唔一定冇得踢嘅，事關陣中有出名好波嘅一哥特警成，加上一班夾開，已經幾有默契嘅隊友肥仔明、鄭家富、楊森同劉秀成，若然有腎病嘅大嚿陳偉業都拚命落場，佔地利嘅港隊點都有些少優勢啩。