進化啦！低頭族！冇錯，任天堂隻新Game《PokémonGO》，上架都未夠一個星期，推出地區只得幾個，就成功育成「低頭族2.0」。

以前嘅低頭族，玩手機之餘，行去邊度都仲係自己話事呀；不過「低頭族2.0」就唔同，行去邊個方向，係由部電話帶住你行！「小智！你睇！左面有隻比卡超呀！」「喂！右邊！有隻傻鴨呀！」結果你向左走向右走就唔知中咗去左定右。係！隻Game係好毒架，不過你可以唔沉迷，但點都要玩，原因好簡單：

1：呢度財經版，咁講啲財經人聽得明嘅語言。即係咁，當一隻Game能夠令任天堂呢隻殘股起死回生，單係4個交易日，就已經累積升六成，市值增超過600億港紙。呢個升浪你已經賺唔到，喂！免費Download你都唔Download？蝕上加蝕！

再者，如果你係科技盲，但又鍾意炒股，你唔Download你點知咩係AR技術？AugmentedReality呀！講埋全名你都未必明，唔明就玩咗先啦。Keep住自己Update新事物係好重要，如果唔係今日啲手遊股大升，你都唔知咩事。

2：仲記得想當年免提電話裝置一推出時，突然覺得條街多咗好多癡線佬，「嘩！條友做乜無啦啦自己同自己講嘢。」去到後來先知，唔係人哋癡線，而係自己無知。如果依家仲同人講Bluetooth好先進，唔該自己走埋牆角反省，家陣講緊手機變精靈球！「嘩！佢癡線架，無啦啦衝過去用手機影空氣！唔通有鬼。」唔想自己講埋啲咁失禮嘅嘢，唔該等隻Game香港一出即刻去DL，唔係等你成日以為自己撞邪就唔好。

3：知唔知比卡超賣點係啦？賣萌？錯！係賣橋呀！你試諗吓，依家香港未有得玩，隻Game已令全香港女士不停講「好想玩呀！我又要捉比卡超！」如果呢個時候，你瀟灑地轉身，戚一戚眉同一眾少女同事講，「我，幫你裝。」然後全部女士喺你身邊圍住你講，「真係架！點解你裝到嘅！你好叻呀！」嘩！咩十萬伏特電能效應都係小兒科！你直頭贏到全世界啦！點可以等香港上架先裝，即頭依家就開個美國iTunesAccount即裝啦！

你再諗下，喺街頭上遇到一隻小精靈，然後一眾玩家都會衝過去，知唔知呢個叫咩時侯？叫愛情來的時候！男士一見到獵物…旁嘅女神，大好機會上前結識，仲有埋共同話題：「不如我呢隻讓俾你啦。」「你差邊隻？我用比卡超同你交換呀！」「我幫你同小火龍影相，你電話係咩？我Whatsapp返張相俾你？」連女神都俾你野生捕獲，世界仲唔係屬於你嘅！你可能質疑，「有冇咁勁呀？」有！你見到《PokémonGO》美國Android下載量，早喺隻Game上架兩日就已超越Tinder，即係個交友App呢。連交友App都過埋，證明隻Game交友能力係幾咁高！

隨住《PokémonGO》世界各地推出，「要用我技倆盡訓練那寵物精英」將會成為潮流，女玩家當然有，最勁係逼到連男玩家都一定會玩，仲會好落力咁玩，單憑呢一點，我肯肯定《PokémonGO》錢途無可限量！

by千頌C＠堆填區
http://fb.co/winbigwok