當年今日
關於我們

瑟頓聯有阿仙奴間諜 最貴球員周薪5,800

蘋果日報 2017/02/17 17:36

瑟頓聯英格蘭足總盃阿仙奴

非聯賽球隊瑟頓聯會喺英格蘭足總盃第5圈主場鬥阿仙奴,估唔到佢哋竟然喺賽前諗到「以槍制槍」嘅方法,請嚟兵工廠名宿麥臣同球隊一齊練波,唔單止咁,連修咸頓名將拿鐵斯都一齊練波,唔知瑟頓聯嘅球員臨急抱佛腳,又可以學到幾多嘢呢?
其實瑟頓聯入面,仲有幾位球員同阿仙奴係有淵源嘅,分別係中場伊斯蒙特、謝比同埋迪勤,佢哋三個都踢過兵工廠青年軍,謝比更加做過真正嘅阿仙奴球員,不過係從來都無上過陣果隻,至於伊斯蒙特都曾經代表兵工廠踢過2010年英足盃對史篤城嘅比賽,當時仲同禾確特、法比加斯同埋丹尼臣做隊友!講開呢支非聯賽球隊,成隊波嘅周薪加埋大約係10,000鎊(大約係96,600港紙),最貴嘅球員周薪都只係600鎊。