特首梁振英同政府高官今日喺禮賓府搞茶敍，同約百名嚟自18區嘅長者過長者日；原來茶敍破咗禮賓府一項紀錄，就係出席嘅長者平均年齡係歷年最高。

與會長者除咗享用茶點，仲有局長粉墨登場搞氣氛。歌喉不俗嘅陳家強、蘇錦樑、譚志源、陳茂波同張雲正組成全男班，高唱《舊歡如夢》同《分分鐘需要你》，冧爆在場長者。黎棟國、吳克儉、高永文就同副局與政助獻唱《月亮代表我的心》。

黃錦星雖然唔唱歌，卻同飾演「大嘥鬼」嘅副局陸恭蕙同政助區詠芷合作「棟篤笑」。譚志源就意猶未盡，同民政局副局長許曉暉演出折子戲《紫釵記之劍合釵圓》，雖則係譚志源第一次，卻有板有眼，長者掌聲不絕。勞工及福利局局長張建宗就負責講笑話o氹老友記。

梁振英同太太唐青儀呢？唔係齋坐嘅。據知佢哋最後同全體官員大合唱「長者日歌」，仲向長者贈送有健康食品、兩蚊乘車優恵八達通咭膠封套等嘅福袋。