涂謹申放完一陣假，終於諗通咗自己喺滙標事件上有一定責任，唔可以再避記者傳媒。的確，做公職嘅人，點可以唔面對公眾？
八方聽聞，民主派對此事一向有兩派意見，一派想阿涂為此事行多一步，即係唔止鞠躬，重落埋台，咁就十分高姿態，可以挽回聲望；但係以李永達同何俊仁為首嘅另一派，覺得如果阿涂辭去議員同民主黨職務，就正中土共下懷，簡直係交貨畀共產黨，所以佢哋唔肯就範，期望公眾明白當前境況係寸土不能讓。

馬紹援今日返港

上周阿涂喺一班民主黨高層陪同下見記者，算係以示團結，達仔同阿仁都想件事告一段落，以後見步行步，等老廉出報告再算，一於以靜制動。不過呢個世界唔會停嘅，八方聽聞三人小組成員之一、會計師公會前主席馬紹援今日會返香港，較早前有消息傳過馬生話要就阿涂事件返嚟開記者會，唔知係咪真嘅，當然照計馬生已經交咗報告，報告後來又全部出晒，阿涂認埋衰，加上老廉又話會再查，馬生應該冇乜需要再見傳媒啦。
但係如果馬生真係覺得有嘢要補充，民主黨都冇符，鬼叫當初又係你哋要會計界出人嚟幫你查，馬生見冇人肯接波就挺身而出，點知又搞出大頭佛，難怪人哋㷫喎。

馬丁、楊森在外

睇番轉頭，整件事壞在處理手法。記得民主黨前黨鞭華叔成日都話班後生做事太急，又唔檢討，又唔反省，點會成功呢？咁又係，連加入三人小組都只係畀三分鐘時間人家考慮，使乜咁急呢？華叔嘅名言係「小事急辦，大事緩辦」，可惜大家都冇聽，永遠係大事急辦。
事情往後點發展冇人知，但係民主黨都係時候痛定思痛，中方肯定想佢哋早啲摺埋，民主黨高層點諗呢？上周阿涂開記者會，八方見唔到馬丁，原來佢陪個仔出去咗英國開課，祖詒肯跟老竇讀番法律，馬丁老懷大慰。而楊森就一家去咗加拿大，又係陪小朋友，兩位前主席都唔喺香港，唔知係咪冇眼睇，達仔呢鋪孭重飛，靠晒你喇。


爆料熱線：29290000、27860099
報料傳真：26239278
報料電郵：[email protected]