當年今日

哥連講鹹濕電話累死Britney

蘋果日報 2005/01/16 00:00


愛爾蘭男星哥連菲路(ColinFarrell)生性風流,最近就有位性愛電話接線生,入稟加州法院告哥連,佢話哥連自從打過去性愛熱線之後,對佢作出連番性騷擾,搞到佢精神失常,唔知正喺日本宣傳電影《亞歷山大帝》嘅哥連,知唔知呢單嘢呢?

要求賠三萬五
據英國《太陽報》報道,一位名叫達絲莎維(DessaraeBradford)嘅性愛電話接線生,話哥連係佢嘅忠實顧客,不過自從佢畀咗個私人電話號碼哥連後,兩個就發生咗一夜情,自始哥連重不時send啲露骨短訊畀佢,又開始跟蹤佢,搞到達絲莎維不勝其煩,精神受盡折磨。所以達絲莎維就告哥連,要求佢賠償約三萬五千蚊港幣,而呢單案就排喺下月十五日洛杉磯度開審。

出書爆性秘聞
達絲莎維重透露,哥連同佢約會嗰陣,曾經自爆過好多性史畀佢聽,𠵱家達絲莎維重諗住寫本爆料書《ADarkTwistedPuppy》,大爆哥連同舊情人嘅性秘聞㖭!當中重包括舊年九月出嫁嘅BritneySpears、ParisHilton同安琪蓮娜祖莉(AngelinaJolie)。
而事件嘅主人翁哥連,前日同《亞歷山大帝》導演奧利華史東(OliverStone)去咗東京宣傳,曾經講過「玩女人唔會上身」嘅哥連,睇怕以後唔敢再口出狂言嘞啩!