王喜今日喺柴灣為由潘紹聰、小占同岑樂怡主持嘅ViuTV節目《晚吹-總有一隻喺左近》擔任嘉賓，王喜透露錄影期間發生奇怪事件，佢話聽到佈景板嗰邊唔同位置有唔同聲音，原來今次唔係第一次，王喜以前拍劇，都有唔少靈異經歷，佢就話：「拍《緝私群英》嗰時，有次一roll機，佈景板嗰邊有人『hur』，但睇playback都聽唔到，另一次喺清水灣錄影廠拍《鄭板橋》，有場戲講入廟拜神，大佛像前面有個木魚，一roll機，樓上控制室話要NG再嚟過，導演嗌咪落嚟鬧臨時演員唔好玩木魚，但當時唔會有臨時演員夠膽玩木魚，博鬧咩，於是睇playback，好明顯有人喺收音器隔籬『扑』咗5下，但係冇人拎過木魚。」

問佢有冇真係見過﹖王喜指有次去新加坡，入住一間酒店時，知道「有嘢」存在，佢話：「床頭後面有個廁所，廁所門對住房門，我喺雪白床鋪上發現一條『閃電毛』，頂，搞錯呀，點瞓呀！後來聽到有人開水喉，我心諗咁猛，於是我入去閂番水喉，房與房之間有道門，我聽到有人狂推道門，酒店啲人話隔籬房冇人住，我咪即刻換房。」

對於有雜誌指王喜密友明仔疑患重病，王喜聞言即表示：「唔答，唔答，多謝關心！多謝關心！」提到好友陳志雲終極上訴獲法院批准，佢曾表示勉強都可以應付律師費，仲笑指王喜曾經講過如果有困難可以賣樓幫佢，王喜話：「係呀，一定係。」

問佢有冇打過價﹖王喜話：「夠找第4、第5年嗰兩轉，前面嗰3年佢自己一個找，第4同第5年即係第二次上訴同埋第二次判決嗰兩轉，我都可以找數，我夠找。」真係好兄弟﹖佢認為現時到咗呢個年紀，錢都係攞嚟搣，踏入50歲就會好明白賺錢能力係每況愈下，你咪開始使錢。」講到下星期三係王喜49歲生日，問佢點慶祝﹖佢話：「都係放生(功德)，同人食吓飯，年年都係咁。」怕唔怕被人捉番﹖王喜話：「唔會，睇你點放，放生需要智慧，巴西龜放落海，好多人都有。」