潮流興寫blog（網誌），有人會將blog當網上個人日記，有人就將佢視作向親朋戚友發佈消息、透露近況同聯絡感情嘅渠道。其實網誌功能好多，只要識得利用，對事業好有幫助！究竟點先可以令網誌更有建設性？LeoBabauta就喺《WebWorkerDaily》討論區醒咗幾招畀網友：

無論係個人抑或工作目標，最好就係推動力夠大。網友不妨透過網誌公開你每個月或每年想達到嘅目標，記低所有進程，等其他人幫你打氣，即使途中遇到難題，都有其他網友支持，唔使孤軍作戰。

越多人瀏覽你嘅網誌，越有利廣交朋友，建立良好人脈網絡。如果你想利用網誌作為履歷一部份，最好就寫多啲專業意見同見聞，話唔定會被潛在客戶或僱主睇中，邀請你加盟或合作搞生意。

網誌讀者來自五湖四海，如果你喺生活或工作上遇到問題，不妨喺網誌留言徵詢其他人意見，或者會有合適嘅人可以充當你嘅軍師。

除咗自我宣傳，話畀人知你有乜專業技能，方便搵工或搵外快之外，網誌仲可以用作交易平台，有咩想買想賣都可以詳細列出嚟，等買家或賣家自己搵上門，連廣告費都慳番。

喺網誌發表偉論，好多時都要引經據典，迫你做多啲資料蒐集，更深入了解每件事，擴闊眼界。就算你只係當寫日記，持之以恒，文筆亦有機會越嚟越好。