廉署一向以三管齊下反貪污,執行處、防止貪污處及社區關係處分別負責查案、為公私營機構檢討程序堵塞貪污漏洞及宣傳教育,三處各司其職,歷年來好少有執行處處長級人員,調去另外兩個處,但放完國慶假,廉署卻出現咗個好罕有嘅調動。
原執行處助理處長朱敏健升做防貪處長,防貪處長陳志新調去做社關處長,本身係AO嘅原社關處長許林燕明就調返政府。名義上今次調動屬署任性質,等政府派另一個AO接任社關處長就回復「正常」,但廉記冇講署任到幾時,而陳志新又就嚟退休,意味近年負責過先科、毛玉萍等大案嘅朱敏健,隨時要統領防貪處一段長時間。
八方聽聞唔少廉記中人對今次調動感到意外,據講連當事人都係上個禮拜先知。至於原因,廉署發言人話有助內部交流,唔會影響士氣同接班安排。廉署中人估計調動同新任專員湯顯明冇直接關係,但防貪處嚟咗個新頭頭,下面班人就可能少咗晉升機會嘞。