教聯會副主席鄧飛呢排頻頻亮相，喺Facebook好活躍，擺明為參選教育界議員鋪路。今日有眼利網民發現，鄧飛懶幽默回應林鄭嘅「禁酒令」，上載一張有啡色滴露、一杯啡色液體相片，caption寫住「看來酒吧要轉賣消毒用品」，心情係「覺得擔心」。連行會成員都忍唔住寸冇用嘅「禁酒令」，鄧飛竟然仲用嚟抽水，不過錯抽火水，八方都真係覺得好無良。眼利網民話，呢個post出完冇耐就消失咗。

鄧飛唔止係教聯會副主席，仲係將軍澳香島中學校長，履歷方面，講嚟講去都係讀中六嗰時參加大台《江山如此多Fun》全港狀元爭霸戰，贏咗個榜眼。上屆教育界議員選舉前夕，一直盛傳鄧飛係代表教聯會參選大熱，但最終殺出蔡若蓮呢個程咬金，有教育界風聲相傳，當時唔少人唔太like鄧飛態度，認為有人唔夠積極兼不時「放飛機」。

蔡若蓮都扶搖直上做埋副局長，今屆鄧飛有望擔正，梗係要積極進取，早喺3個月前開定個Facebook專頁，日日同網友交流。除咗被刪嘅滴露post，鄧飛近排有好多post都值得關注，例如將自己個頭key落名錶代言人陳偉霆，再自稱手帶代言人「鄧偉霆」，呼籲隔離人士唔好周圍去，仲有一眾教聯會高層西裝look英雄風格海報、呼籲老師登記做教育界選民，真係玩味甚濃。

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架