【紋身教師】 卓林同外籍密友屋企過夜? 吳綺莉指囡囡染奇怪行為
卓林吳綺莉外籍密友
做人父母,除咗要照顧仔女學業同健康,仲要顧及仔女嘅情緒 。今年踏入18歲嘅吳綺莉愛女卓林,3月同媽媽爆母女衝突,吳綺莉更涉嫌刑事恐嚇被捕。而卓林亦一度入院留醫,至近日先出院。母女再度團聚,冰釋前嫌有講有笑。
不過,日前有報道指卓林出院後,繼續同一名外籍同性好友密會,而卓林呢位密友,有指係喺香港生活、年約30歲嘅加拿大網絡紅人。《蘋果》喺佢名為Andiautumn嘅Ig中,發現佢不時作低胸性感打扮,唔少濃妝相化到好似大眼洋娃娃一樣,而且亦不時騷紋身手臂。有指呢位網絡紅人之前做過幼稚園教師。佢同卓林識咗約1年,二人相識冇耐已經形影不離,更甚係卓林曾經帶過呢位密友返屋企住近1個月。
其實早前吳綺莉同卓林關係轉趨惡劣嘅時候,吳綺莉曾經講過話卓林經常帶一個年約30歲嘅女子返屋企過夜,兩人更會關上房門,又指卓林沾染唔好同奇怪嘅行為。(新聞連結: http://bit.ly/2o57x4K ),未知呢位外籍密友係咪同吳綺莉口中所講嘅,屬同一個人。《蘋果》今日致電吳綺莉,佢回應話自己係認識囡囡呢個朋友,又指對方係卓林補習老師:「佢嗰位朋友以前係大埔教幼稚園,係幼稚園老師,但後嚟冇咗份工,卓林數學唔係幾好,佢同我講個女仔冇咗份工,仲話唔收錢上門幫佢補習,我話咁樣唔好,同埋佢話嗰個係朋友。」對於卓林出院後,繼續約會呢位密友,並承認對方曾在家中過夜。問到擔唔擔心佢哋太close?佢話﹕「我知,卓林有同我遘過,咁個女今年就嚟18歲,成年人,我只可以咁講。」