現年45歲嘅吳奇隆，5年前同細佢16年嘅劉詩詩合作拍攝內地劇《步步驚心》撻着。四爺同若曦（劇中角色）將會喺後日3.20喺峇里島五星級酒店AyanaResortandSpa舉行婚禮。《蘋果》記者今日直擊婚禮現場，發現多個出入口大閘已守衛深嚴，長期有保安員駐守，當記者行近都有人員前嚟問話。「酒店方面亦都好緊張，連住客及遊客經過婚宴場地都要check手袋，唔想婚宴範圍曝光。」

而婚禮現場已有數名疑似公關人員在場打點，另約十名配戴證件的中國籍人員及與「30幾」位名皮膚黝黑嘅峇里人開始用鐵架搭建「帳篷及舞台」，仲有攝影師開始用航拍試飛。AyanaResortandSpa既戶外環境美不勝收，擁有180度廣角嘅日落海景，而鄰近花園則可容納1,000人嘅站立式雞尾酒會。

至於吳奇隆同劉詩詩嘅重要親友亦陸續抵達峇里島。囝囝結婚，做阿媽當然最開心，吳奇隆嘅媽咪受訪時笑唔停，讚到新抱仔劉詩詩萬般好：「最喜歡詩詩安安靜靜，我沒女兒，已把她當女兒；當然希望他們快點生小孩！」隆媽手上有一隻blingbling鑽戒，佢話係劉詩詩送嚟孝敬佢嘅禮物：「這詩詩送的啊！」業界估計呢隻鑽戒約1.5卡，加上周邊鑲碎鑽，約值25萬港元。

另外，吳奇隆同劉詩詩選用嘅DeBeers婚戒更刻意用兩人名字諧音576及644，吳奇隆更特登訂製一隻5.02卡DIF完美無瑕的全美鑽石送給劉詩詩，內地傳媒估計約值1,200萬，鑲嵌花六個月時間。

此外，擔任伴娘嘅劉心悠今朝起程往峇里，佢透露機票和住宿都是一對新人包辦，問到《步》劇眾演員係咪齊齊到賀？心悠話：「相信有邀請，但係咪個個有時間嚟就未知。」