自長江集團屬下嘅生物科技公司傳出有意上市後，一啲人配合近期股市上升動力，乘機大炒「生命概念」（生物科技、生命醫學、生化基因為本藥物等等），一啲不見經傳嘅所謂生化股居然升到飛起，情況有如九九年末嘅i股，當時唔少公司改名，將個i字放在前面，以示轉型，今日又時興改做「生命」，例如「左丁山生命公司」，以配合炒風。總之香港人脾性好炒，一貫執輸行頭，慘過敗家嘅精神。
唔係話潑冷水，香港何來「生命科技」？將傳統中藥包裝成健康食品就有，美國式嘅生物科技就一定冇，唔係嘅話，左丁山識得幾位老友，其中有美國英國嘅「生化博士」學位，呢兩年來喺香港搞「生物科技」顧問，搵錢引進美國科技在香港南中國發展，點會只係得個捱字？

賓架D以前係外滙高手，退休後四年來只係專心做一樣嘢，就係晚晚昅住納斯特克市場嘅生物科技股，佢嘅工作時間係晚上九時至次日凌晨四時，除咗炒生命股之外，重閱讀大量網上嘅生化工業分析報告，久而久之，已成為一位「生命股專家」，前晚食飯時問佢有冇炒香港嘅生命股，佢哈哈大笑，講畀左丁山聽：「香港何來生命科學？以前炒i股香港都話有啲IT人才吖，乜香港有生科人才咩？大學就有啲蛋頭，商界就一個都難搵。」佢對生科人才嘅定義大概好似楊啟彥田北辰兩人對「好朋友」嘅定義，各有不同。