前日立法會加快民主進程辯論,大家都走晒去聽緋聞議員何鍾泰繼續自爆同譚姓助理嘅曖昧關係,再三否認用公帑畀家用助理。點知議事廳入面嘅馬丁就企起身話唔夠法定人數開會,重話自己之前喺樓上同劉江華爭電視睇爭輸咗。
八方噚日問番馬丁乜咁瘀?佢話當時喺飯堂醫緊肚,以往一般都係一邊食,一邊聽住個辯論直播,點知民建聯一大班人圍住個電視睇新聞,馬丁於是問可唔可以轉台,佢哋一齊話唔得,劉江華重話梗係先到先得,冇得轉。民建聯壟斷視野,咁好彩飯堂有另一個電視,馬丁先至冇咁瘀。
馬丁話,佢咁緊張,係因為不值班民建聯口口聲聲話支持○七○八年全面直選,其實得個講字,自由黨又係一樣,呢班中性動物連辯論都唔聽,你話邊有承擔?明年一重返議會,班保皇黨又同林D9扯貓尾,一味死拖,所以啲選民一定要帶眼識人,唔好用張選票嚟侮辱自己智慧。
傳真︰2623-9278
電郵︰
[email protected]