於四十年代紅極一時的中國電影皇后陳雲裳在上月30日在香港寓所睡夢中離世，享年103歲。陳雲裳家人今日在香港殯儀館為她設靈，一眾好友如胡楓（修哥）、馮寶寶、吳光正等陸續到靈堂致祭，導演楊凡在7點50分抵達，他在殯儀館門外上樓梯時更不慎仆們雙手着地。

修哥今日傍晚約6時40分到場向陳雲裳致祭，他接受訪問時說：「當然係前輩啦，我唔知佢幾時息影，不過佢息影嘅時候我應該未入行。我7、8歲到已經係佢粉絲，聽到陳雲裳個名，亦睇過佢嘅戲。當時唔識得佢靚唔靚，不過就知佢好有名。」

修哥又回憶起在港澳兩地欣賞陳雲裳舊作：「喺香港睇過佢一套同馬師曾演嘅《賊王子》，好有印象；之後喺澳門兩套，一套叫《木蘭從軍》，另一套叫《一夜皇后》，o依家對《木蘭從軍》仲有啲印象。」

講起相識經過，修哥覺得似故事般有緣：「入咗電影界，冇諗過會相見。約三年前有朋友識陳雲裳，我叫對方介紹認識，陳雲裳答應話好，有試過同佢飲茶，當時佢好精神，成日同人打麻雀，聽朋友講佢去世前幾日都仲同人打緊麻雀。識咗佢之後，佢請我去山頂食晏，無耐又請我去赤柱別墅食晏。佢都有睇過我啲戲，認識我，好傾得埋。我最近都同朋友講，大家約陳雲裳出嚟見下面，可惜呢個約會唔成事喇。」修哥大約半小時後離開，又在大堂遇見馮寶寶，兩人寒喧後擁抱互相安慰。記者問寶寶姐是否專程回港出席喪禮，但未有回答便進入靈堂。