醫好之後,世姪M照常東奔西跑,去完土耳其就帶隊去泰國,呢幾日又去咗日本。睇電視見到中國學生示威,高喊抵制日貨,於是打電話問世姪M媽咪:「喂,M仔去咗日本,冇事吖嘛?」M媽咪話:「唔知喎,佢又冇講,佢留低咗個日本手機電話,不如你問吓佢。」
呢排晚上九時後,用手機打電話去日本,每分鐘只收兩毫半,好抵啫,於是等到曼聯對紐卡素爭足總盃決賽開波之後,先至打電話去日本,東京已經係晚上十點幾咯。問世姪M:「唔怕有事吖嘛?小心啲好喎。」世姪M大笑:「丁山叔唔使神經緊張,東京一片太平,啲人完全唔理會上海示威。今日下午我帶人去秋葉原睇電器,周街都係人,好多商店扯橫額,用中文字,歡迎中國遊客,又有商店喺玻璃窗貼出中文告示:本店有中文專家為客人繙譯。都唔知有幾多大陸客在秋葉原掃貨,掃得唔知幾高興,啲日本商店東主更高興!」
睇嚟啲愛國人士如何俊仁、馬力等等,應該要呼籲埋杯葛日本旅行團!