黃之鋒正式宣佈成立新參政團體，揭開9月立法會選舉新政治力量全面參選的序幕。有泛民中人直言，類似政治新勢力選前肯定陸續有來，今屆立法會選舉並無新增議席，若不作協調等同攬炒；有泛民中人私下想過不同協調方法，例如搞一次預選，但要面對相當多難題，要各方接受並不容易。
季陶聽聞，有部份泛民中人認為，如果9月立法會選舉不盡快就參選名單進行協調，最終必定攬炒收場，理想的協調方法自然是搞一次泛民預選，先定各區最多可派出多少泛民參選名單，再以民間投票方式，由一眾泛民團體選舉，「如果某區泛民最多出6張名單，但有9個政團派人選，咁最好由民間預選，喺9張名單入面選6張出嚟」。

新生力量難協調

不過也有泛民對預選方案大潑冷水，因為預選要成功，必須所有泛民政團均支持，「基本上除咗本土之外，其他泛民政黨團體都要參與，但對新興團體嚟講，一定覺得預選不利佢哋，如果佢哋唔玩，咁預選已經冇意義」。另外，預選以甚麼方式進行也屬「有排拗」，「後生嗰班梗係想用網上投票，但傳統政黨梗係想做實體投票，淨係呢樣都未必傾得掂」。
假如不搞預選，只是協調名單又是否可行？另一泛民中人笑言，那些年輕新生政治力量，根本難以協調，「佢哋口中嘅協調，就係你班主流泛民搞咁多年搞唔掂，讓個位出嚟畀佢哋」，所以不少泛民均相信，最後9月立法會選舉，各大泛民陣營成功就參選名單「傾掂數」的機會相當低，「最後個個出名單，啲票𠝹到亂晒龍，泛民齊齊攬住死，而建制派就真係多謝晒」。

季陶
周一、三、五刊出