樂基兒、馬詩慧、王曼喜、鄭希怡等今日喺銅鑼灣出席護膚品牌CLARINS活動，對於樂基兒同拍拖兩年、從事網上有機食物生意嘅才俊Ian Chu拉埋天窗，佢透露婚期已定於8月27日（美國時間）喺加州舉行，問佢籌備成點？樂基兒話：「場地佈置、嘉賓已經準備好，但自己嘅裙、打扮、珠寶、鞋、化妝就未決定，呢分鐘仲未好緊張，可能返到美國就會搞，我都係啱啱返香港，之前自己去咗泰國做瑜伽一個月，心境好平靜。」

問到佢會請咩人去婚宴？樂基兒話：「唔係太多，但會請小學同學，香港朋友同model都冇請，因為主要係for family，大約50人。」佢又指婚後會跟老公喺香港居住。點解選擇加州舉行婚禮？佢表示：「屋企人喺美國，而且8月天氣好，唔似香港又熱、又打風、又落雨。」會唔會著婚紗？佢話：「搵到應該會，我有朋友會幫我造條裙，今個禮拜會去睇婚紗。」老公畀唔畀性感？佢話：「佢喺美國讀書，外國化。」問到前夫黎明有冇發短訊祝賀佢，樂基兒表示：「冇，好少聯絡，大家各有各忙，我唔知佢知唔知。」會唔會請黎明去飲？佢好決絕咁話：「我連好多香港朋友都唔請喎！」

講到王曼喜同王麗嘉經常喺社交網貼性感相，惹來爹哋王敏德微言，仲揚言要開家庭會議，馬詩慧話：「細女返咗嚟，家庭會議？嗰啲好容易解決，佢（王敏德）冇乜記性o架，講完唔記得，其實我覺得冇問題，但作為嗲哋係會緊張啲，咪佢自己去開囉，我唔開喇，費事我開嘅時候加把嘴啦，佢都見咗細女嘅男朋友。」提到王曼喜今日正日生日，佢表示今晚會同屋企人食飯慶祝，亦收到父母送嘅禮物。談及佢早排喺Facebook開設一個同性戀群組，王曼喜話：「好多人加入，之前約過出嚟一次聚會，覺得好有凝聚力，我希望做好啲。」此外，鄭希怡指早前一家三口去泰國旅行，期間成功幫囡囡梁浸浸戒掉奶嘴同尿片。