揭法師龍哥底細
原來喺挪威揸鑊剷

蘋果日報 2017/08/09 00:00

龍哥杜慶龍BigBoys歷險記超度亡靈

大台節目《BigBoys歷險記》首集,人稱龍哥嘅杜慶龍師傅(龍哥),喺西貢超度亡靈,一句「乾坤一開,三七氣流一開」嘅freestyle唸咒方式,加上七情上面又喊又笑嘅演繹,令觀眾一見難忘,其獨有嘅唸咒方式,更成網民惡搞對象。

龍哥超度亡靈片段,一夜間喺網絡洗版,可惜首集播出後,大台高層余詠珊決定將餘下三集,逢有龍哥超度嘅片段全cut,原因係:「呃神騙鬼是不可以在這個時段播出,不可以妖言惑眾。」

事件愈鬧愈大,昨日有周刊指當事人杜慶龍,即飛返老家挪威避風頭。報道亦指年過60嘅龍哥,已婚育有兩子一女,早喺70年代已經移民挪威搵食,由最初揸鑊剷到開中式餐館「龍苑」(Lung Garden)。至於何解由餐廳大廚變成捉鬼法師,龍哥就曾經喺《Big Boys Club》中講過30年前自己開工時,遇上一位高人指點,對方告知佢有幫人驅鬼能力,自此就喺挪威當地幫人驅邪捉鬼。

據知龍哥每次幫人捉鬼,都只係象徵式收吓利是,不過由於驅邪期間,講到自己得玉皇大帝幫助,又有能力調派天上十二金龍改風水磁場,加上龍哥獨門驅邪方式,就連堪輿學家吳佩孚同司徒法正都話未聽過見過。