行街碰到物業管理經理L君，佢手上一本雜誌係講寵物嘅，怪而問之：「最近研究養寵物咩？」物業L話：「正是。仔女大咗，兩個人都去咗留學，老婆以前最反對養狗，𠵱家可能得閒得滯，最近居然話要買隻狗仔、貓仔養吓，搞到我頭都大，我最反對在住宅內養貓、養狗，我管理嘅屋邨唔鼓勵居民養貓養狗，一來難管理，二來啲人拉狗出街，冇公德心，屋邨街道時有狗屎貓尿，唔衞生。同老婆幾乎鬧交，卒之我贏咗，因為我嚇佢慎防禽流感，擺隻動物喺屋企，相當不智。嚡，最近調職，去管商業大廈，位處旺區，大老闆下令養四隻狗，我哋已經買咗四隻，我做經理，要終身學習㗎，咪買啲書，買啲雜誌嚟睇吓如何管理狗隻囉。」

聽到都想笑，物業L讀小學之時，喺新界俾隻狼狗追過兩條街，嚇餐死，到現在仍留有陰影，點會養狗吖。不過老闆之意難違，皆因上頭見世貿逼近，傳媒日日唱到時有大示威，唔係香港人順民上街好和平嗰隻，況且慎防恐怖分子呢，巴基斯坦傳媒發放報道（或係假消息），恐怖分子會襲擊本港酒店喎。於是本港各大銀行、大集團紛紛做定應急應變計劃，以防萬一，物業L間公司應變有幾種方法，其中一項行動就係買受過專業訓練嘅狼狗，識得聞味道，聞炸彈毒品嘅，用來巡查大廈，物業L係經理級，唔使佢拖狗，但都要識啲㗎，咪硬起頭皮去學習狗性囉。
物業L話中年學番「狗之管理」，皆拜世貿所賜，如果唔係，公司唔會用咁多人力物力去做應變應急計劃。佢學到，狼狗嗅覺，唔會永遠保持記憶，要隔個零禮拜，就要重新訓練過。經一事，長一智，養狗防恐怖襲擊，一啲都唔輕鬆。物業L更覺頭痛嘅係灣仔會展一帶到時封路，十分唔方便，譬如去君悅酒店訂聖誕禮物籃（Hamper），世貿期間唔送貨，即使係送去隔籬嘅寫字樓大廈，都要等到二十號先至會送！